Tekið af vef Þjóðminjasafns Íslands:

Þjóðminjasafn Íslands vinnur að útgáfu fyrstu handbókar á íslensku um varðveislu safnkosts. Um er að ræða tvö bindi með fræðsluefni sem tekur til margra þátta varðandi langtímavarðveislu efnislega hluta menningararfsins.

Verkefnið hefur verið unnið í samstarfi við Þjóðskjalasafn Íslands og Landbókasafn Íslands – Háskólabókasafn. Þá hefur Þjóðhátíðarsjóður stutt dyggilega við verkefnið.

Handbókin er ætluð öllum sem starfa við varðveislu menningararfsins, þar á meðal safnmönnum, skjalavörðum, fornleifafræðingum, prestum og staðarhöldurum, en nýtist einnig háskólanemum í þeim fræðigreinum sem tengjast menningararfinum.

Við undirbúning íslensku handbókarinnar var vönduð og ítarleg bandarísk handbók höfð til hliðsjónar, National Park Service Museum Handbook. Kaflar úr þessari handbók voru nýttir sem fyrirmynd að íslensku handbókinni, en forverðir og  sérfræðingar á ýmsum sviðum hafa þýtt og staðfært textann með íslenskar aðstæður í huga.

Handbókin skiptist í tvö bindi

Fyrra bindið fjallar um grunnatriði um umhverfi í söfnum, meðhöndlun og pökkun. Einnig er fjallað um skilyrði í geymslum, öryggi safnkosts og neyðaráætlun.

Seinna bindið mun fjalla um varðveislu gripa eftir tegundum og efni.

Handbók um varðveislu safnkosts-ÞJMS